Bolokaaji Nuwaasoo,wonnoo ko koɗorɗe gollotooɓe Leydi Moritani,kono hannde ngal ñalli ko e dente e cente-cente Sagataaɓe 25 Feebiriyee,wiyɓe loppet lorɓet laamu Asiis,ɓee ɗoo sukaaɓe,sagataaɓe Fees book saasɓe e miijo mumen,ndentii ngmmbii,mbiy ko hollirooɓe salaare mumen e Laamu Seneraal men!.

Sagataaɓe boowal Bolokaaji ndentii,mbiy ene nodda Ɗowngu Moritani yoo rewlaawol,wayla jaɓɓal,gila e Jaagorɗe ɗee,haa heɓa dawrugol…kono mbele wonaa ko ñawni Leydi ndii ko ɓe noddata kadi,sabu lohni ndi ko leñamleñamaagu e ŋoyde won ɓeen,lanki heddiiɓe!mbele so ummannde goonga ummanaama,nuunɗal sompaama e lara keeci mayri,yoga e wulloɓe ɗoo ɓee njermintaako ?

Sinno ko goonga,walla so tawiino ko nde jam,Leñƴi Moritani kala ndentat ngona gootum,sabu ko dental woni doole,kawtal semmbeeji yaawri poolgu!kono wonaa ɗuum woni ko woodi hannde e mayri,ardiiɓe ɓee,mbaɗi ko dawrugol seerndu koonoɗaa!.

Sinno alah ndoo woodaani,hoɗaa,wuuraa e leydi hee tan ko enen ndenndi,kono ko miin tan jogotoo,mi fecca ɓee,mi yeɗa ɓee,fiya weñcita,mbeɗe waɗira kala no mbeliraa mi! ko ndii mbaydi rokki Laamu nguu hoolaare,alah ko luutndo waawi waɗde,ko ene dillina Ɗowngu nguu,sabu so Ɓaleeɓe ndillii,Safalɓe mbiyata ko enen pewjantee,njooɗoo,so Safalɓe ummiima,Ɓaleeɓe mbiya ko e men ɓe tiindii,walla ko kamɓe ngoƴaa,kala nodduɓe,haddiiɓe ɓee ŋeddinoo,ko ɗuum rokki Laamu nguu cuusal e hoolaare waɗde kala ko yiɗi e no yiɗiri,haa ɗuum saabii ngu woni ɗokku e dawrugol maggu.

Dental Bolokaaji Sagataaɓe 25 Feebiriyee noddii,heewɓe nootiima,daaɗe dow eɓe ngulla e Mikrooji,yoo Ɗowngu Lagdaf saam,yoo Ngardiigu nguu waylo,kono ɓe mbiyaani yoo potal wood,yoo nuunɗal ñiiɓ…

Mbele wonah wuttundu Ben Aali,reggini Mubaare,yerɓini Kaddaafi,jermini Laamɓe Dunndariyankooɓe Aarabeeɓe,mbele wonaa nduun ñeeŋtotoo ɗoo e yeeso Abdul Asiis ?

Ko haɗi mo dillude,mbele ko wonde jaambaaro,walla ko hoolaade alah ko ɓe mbaawi bonnande mo e Ɗowngu makko !ko woni yeeso noon!daɗaani gite.

So jom bara hejjii,buubi ngabboo!.

Abdul Kelli

www.yaakaare.com