Ɓesngu Misra nawii raay ! |
![]() Mubaarak e laamu mum njeytaama e daartol. Hosni Muubarak jibinaa ko ñalnde 4 mee 1928 (duuɓi 83 hikka). Caggal nde o joofni jaŋde hakkundeere, o naati Duɗal Koninkaagu Misra; o heɓi ɗoon seedantaagal e ganndal koninkaagu. E hitaande 1958 o janngoyi diwnugol diwooje, o hoonii sibu kanko ari yeeso fof. E hitaande 1963, e wolde hakkunde Alaseri e Maruk anndiraande «wolde ceenal », Maruknaaɓe njaggi mo tawi ndiwoowa makko ina yani e nder jeereende Maruk ; ɗum ko e laamu Naseer wonnoo. E nder wolde hakkunde Israaiil e Misra (1967-1972) o ardiima nokkuure konu weeyo, hade makko waɗeede kalifu geɗe koninkaagu. O takkanaa kadi galaŋ e wolde Kippuur, hade makko waɗeede cukko hooreejo leydi e hitaande 1978 e cukko hooreejo parti national democratique (PND). Nde Anuwaar el Saadaat waraa e hitaande 1981, o lomtii ɗum e gardagol leydi ndi. O toɗɗaa hooreejo leydi e woote juɓɓinanooɗe ñalnde 13 oktoobar 1981. O toɗɗitaa e kitaale 1987, 1993, 1999 e 2005. Palestinnaaɓe kiisii ko o ballidiiɗo Israaiil. Ko o kaɓdiiɗo fedde Hamas to Palestiin sabu mum salaade siifondirde beldital e Fatah. Ko ɗum addani mo ummanaade mahde, tuggi saawiyee 2010, heɗɗaawo njamndi les leydi ngam haɗde geɗe nguura naatirde tunel feewde hettere Gasaa. Daraja makko e leydi ndi fuɗɗii ustaade ko nde ɓiyiiko biyeteeɗo Alaa tuumaa e geɗe njeenaari keewɗe. Ɗum haɗaani ɓiyiiko biyeteeɗo Gamaal o ƴellitaade e nder parti laamu ngu, hono PND. Heewɓe mbiyi ko oon o yiɗnoo lomtinde e laamu he. Ngalu Mubaarak e ɓesngu mum E laamɓe honɓe ngalu leyɗe mum en, mbaɗten heen Hosni Mubaarak. E tuugnaade e wiyde haralleeɓe (e nder jaaynde Biritaniyaa wiyeteende The Guardian, ngalu ɓesngu Mubaarak ina waawi yettaade 70 miliyaar dolaar, hono no paamraten, fotde ujunnaaje noogaas miliyaar ugiyya, e binndol limooje 20 000 000 000 000 UM. Ko nii ngu feccitorii : Hosni Mubaarak e hoore mum jogii heen ko miliyaaruuji 26 dolaar, jom suudu makko, hono Susaan (Suzanne) ina jogii heen miliyaaruuji ɗiɗi, ɓiyiiko afo, hono Alaa, ina jogii heen miliyaaruuji 14 dolaar, Sammbaajo makko, hono Gamaal ina jogii heen 29 miliyaar ugiyya. Ndeke, Ben Aali e ɓesngu mum, njettaaki Mubaarak e koppi nii, ngalu ɓeen millitenoo ko hedde miliyaaruuji joy dolaar. Hay Bill Gates, Ameriknaajo ɓurɗo alɗude, yettaaki ɗoon, sibu dañal mum fof ko hedde 54 miliyaar dolaar !
Bookara Aamadu Bah source FBP
|
Mercredi, 16 Février 2011 22:20 |