Goomu Pulaagu ena jogii weltaare mawnde habrude renndo Fulɓe no diidorinoo wonde Mozilla yaltinii wanngorde mum wiyeteende Firefox e ɗemngal Pulaar! Ko ñalnde 5 lewru Korse nduu Mozilla habri-min jaltugol Firefox betaa (yamre ƴeewndo) e ɗemngal men. Mozilla hollirii weytaare mum e njettoor mum fayde e Goomu Pulaar-Fulfulde gollodiiɓe e maɓɓe e ndee eɓɓoore moolanaande. Yoo Fulɓe nganndu ko teddungal e heftineede ɗemngal mum'en soomii e gollotiral hakkunde Mozilla e ɗemngal men. Firefox woni hannde wanngorde ɓurnde huutoreede e geese!
Hol ko woni Firefox?
Kala nde neɗɗo huɓɓi ordinateer mum, naati e enternet ngam ndaarde lowe, neldude ɓatakeeji walla yiylaade humpito, o huutortoo ko wanngorde ngam naatde e ɗeen lowe. Ko e wanngorde ndee neɗɗo naatnata ñiiɓirde lowre (wano www.pulaagu.com) ngam naatde e lowre ndee. So o naatii e lowre, kelle ko wanngorde ndee yaltinde kelle ɗee haa ɗe mbaawa yiyeede. Firefox (mo Mozilla) ko wanngorde geese yaawnde, weeɓtunde e hisnde wonndunde e eɓɓoore: mahde enternet ɓurɗo yuɓɓude tee waɗan maa wanngorde lobbere.
Wanngorde e nder banngorɗe
Banngorɗe ena keewi kono nanndaani. E daartol ɓadingol, banngorɗe keewɗe ena ngoodnoo kono nde wonnoo ɗe njuɓɓiraano noon fof, ɗe ngoppaama. Hannde fooɗondirta araaraay oo ko Microsoft Internet Explorer, Firefox, Google Chrome, Safari, Opera ekn... Firefox hannde woni wanngorde ɓurnde yaawde heftaade banngorɗe mawɗe wano hono nde Microsoft ndee. Ko hokki Firefox martaba mo jogii hannde oo ko wonde-mo Opens Source (mo neɗɗo kala rimɗi huutoraade, waylude ekn) etee jarataa hay mbuuɗu! Kono wonaa ɗoon tan haaɗi... So en mbiyi eɗen limta ɗoo maantinooje Firefox fof, doggol ngol juutat haa ɓurta! Ko ɓuri teskinde e majje ko ɗee: - peeragol beeɓngol: - ñisgol dokkol - kisal toongal - keertingol ceeɓngol - teknologiije ɓurɗe hesɗude - weeɓde heɓeede Kono fannu Firefox ɓurɗo heewde nafoore e men ko waawde heɓde yamiroore waɗtude-nde e ɗemngal men Pulaar. Ko ɗum addani-en heɓde hannde wanngorde, huunde nde meeɗaani dañeede e yoga e ɗemɗe Afrik. Ko Mozilla, jeyɓe Firefox ɓee ngollodi-ɗen gila hitaande 2010 ngam yaltinde Firefox e ɗemngal Pulaar. Golle ɗee ɓamii ko ɓuri hitaande tawa go puɗal e mutal so wonaa ñalnde dawaaka! Gila ndeen, Pulaar ko ko heftinaa tigi ɗo Mozilla ɗoo sabu men jeyeede e ɗemɗe ɓurɗe yaawde haljitde golle ɗee. Caggal nde Firefox bayyinaa e yamre wortaande, haŋkadi kala sahaa, ena hesɗitinee. Firefox ena yaltine yamre hesere lebbi tati kala haa e nay. Sahaa kala topotooɓe ena njokki golle ngam ɓeydude wanngorde ndee yuɓɓude, hisde e welde huutoraade. Kala ko ɓe ɓeydi e Firefox, wanngorde maa maa "tintine", wiy-maa yo a aaf ɗum e nganndi maa.
Noddaandu fayde e Fulɓe
Renndo Fulɓe fof no diidorii ena bismaa yoo aawto Firefox, aafa ɗum e nganndi ngam huutoraade sahaa kala. Ko noon tan neɗɗo waawi faamirde kelmeendi ndii, sabu ko kelmeendi karallaagal ceeɓndi mo anndude Pulaar yonaani faame! Ndee yamre betaa nafata ko yiylaade pergitte e caɗeele foti ko e fulo walla e yuɓɓo wanngorde ndee. Ena ñaagaa kala aafɗo Firefox e Ngaandi mum yoo winndito e Jakkaa Fulɓe ngam yeewtude toon baɗte ƴeewndo tpoirde ndee. Firefox jogori yaltude ko e fannuuji ɗiɗi: Firefox ordinateer biro, e Firefox mo cinnde Android. Mozilla udditanii Pulaar damal to lowre mum Mozilla Support. Ko toon wonata lowre Wallitorde Firefox Pulaar. Kala caɗeele, naamne, jowe, wasiyaaji ko to ndeen lowre waɗetee. Kadi lowre ndee ena jogii binndanɗe keewɗe pamminooje no Firefox huutortee. Ɗeen binndanɗe ngoni ko e gerngal ena wiyee Ruttorde Ganndal. Binndanɗe Ruttorde Ganndal ɗee fof piraka tawo e ɗemngal Pulaar. Ko golle maawɗe, keewɗe caɗtuɗe so neɗɗo heblaaka, kono juuɗe ena coklaa toon ngam gaynude golle ɗee e lebbi seeɗa. So RG ndee gasii, haŋkadi kala ko anni neɗɗo ko toon tan yahata, yiyloo humpito ñawndoowu caɗeele mum e Ruddorde ndee.
Kuɗil Ibraahiima Malal SAAR
Source : http://www.pulaagu.com/ |